Sjalevaeger veur ’t laeve

Zittesj Vastelaovesleidjes Konkoer 2023, Nómmer 3
Teks: Theo Weijman, Meziek: Mark Willems
Jaortal: 2023
Zangk: Lisa & Max Schiffler
CD: Zittesje Vastelaovessjlagesj 2023

Koeplèt: 1
Es jungske van sjus viefteen jaor,
Moch ich allein op sjtap,
’t veil de mam waal henjig zjwaor,
Och, laot haëm, zei de pap.
’t Eesj get katsj, mer al gans vlot,
Gouf ich doe richtig gaas,
Es rizzeltaat de bóks kepot
En sjramme oppe naas….
Mer greutsj wie eine paw,
Noe noots mee misse wou…

Refrein:
Bèn eine sjalevaeger veur ’t laeve,
Volop geneite, zorg aan de kantj,
Num ’t d’r van, jao dat is ein gegaeve
Hie in ós Zittesj Vastelaoves-landj…
Bèn eine sjalevaeger veur ’t laeve,
Zös daag op sjtap, pès ruum nao sjloetingstied,
Hemel op aerd, al is ’t mer veur aeve,
Ech, zo’n gevuil wils te noots-never kwiet !

Koeplèt 2
Kump vastelaoves-tied dich bie,
Dan raak ich gans van sjlaag.
De onrös geit mich aan de prie,
Krieg las van miene maag.
Ich mot en zal de eesjte zeen,
Gein feeske zónger mich,
Bèn klaor d’r veur van kop tot teen,
Ein lach op mien gezich….
Al geit ’t wie ’t geit, Dit misse wil ich neit 

Koeplèt 3
Noe waer ich langzaam awd en gries,
Bèn neit mee al te vlot,
Mer mit de optoch is ’t pries,
Dan jeuk mich ech de vot.
Dan sjnap ich mich de oma vas,
En kniep d’r tösje-oet,
Es köppelke mit sjluppejas,
Mit sjmink op oze sjnoet….
Zo vuil ich mich gans goud,
’t zit mich in ’t bloud