Och wat sjoon

Tekst Frans van Binsbergen, Meziek: Louis Herber
Jaortal: 2000
Zangk: Cyrille Niël

Koeplèt 1:
In de laoterie wón Opa oots den allereesjte pries.
Hae ging mit de bös ein paar daag lekker sjtappe in Paries.
Bie de nachrevuuj voolt opa zich metein al lekker toes,
en trök in Zitterd, hoors ze opa zèngend in ’t hoes.
Ich wil metein terök, en hae zóng dao aan ein sjtök.

Refrein:
Och wat sjoon, och wat sjoon, dat wil ich waal dèkser doon.
Jao, ich weit noe heel besjlis, wat ich jaore höb gemis.
Och wat sjoon, och wat sjoon, dat wil ich waal dèkser doon.
Jao, ich weit noe heel besjlis, wat ich jaore höb gemis.

Koeplèt 2:
Sjarel ging mit zien Marieke veur den eesjte keer op sjtap.
Wie ze heivesj ginge haet hae zich Marieke êns gesjnap.
Aafsjied numme deige zie bie ’t kèndj in ’t portiek.
Wat Sjarel doe óntdekde, jao, dat vónj hae bès waal sjiek.
Verpópzak ging hae trök, en hae zóng ’t ganse sjtök.

Koeplèt 3:
Zefke moosj mit vastelaovend ummer nao de wènjtersjport.
’t Mènke wis neit baeter, dach, ich kóm hie niks te kort.
Zefke woort doe Zef en houfde neit mee nao de après-ski.
Hae bleef mit vastelaovend veur den eesjte keer èns hie.
Hae zat zich op ein krök, zóng drie daag aan ein sjtök.