Dan wurt 't Vastelaovend

Koeplèt 1:
Wae in Zitterd is gebaore, hiltj van schpas en schaele kal,
zal mit mich mòtte verklaore: Carneval geit baovenal !
Al mòt veer nog ei tiedje wachte, einmaol kump toch weier den daag,
dat veer nao zoo lang te schmachte os weier in ei leelik wief verkleije maag.

Refrein:
En dan wurt ’t vasteloavend, laamaekerie, wauwelerie en schpas.
Jao, dan wurt ’t vasteloavend, boerekeil, domino en schluppe jas.
Jao, dan wurt ’t vasteloavend, es de verkesblaoze oppe Schteivig schlaon.
Jao, dan wurt ’t vasteloavend, es zich alle luuj weier òngerein verschtaon.

Koeplèt 2:
Schtrak, dan zult te weier viere, es te dich in ’t schterfhoes zets.
Maskes, hoeraes, schwaaje, schwiere, Zitterd op zien auwerwets.
Achter maskes en gerdinkes wurt de waorheid zich gezag.
Apeneutjes, appelsinkes haet Prins Carneval veur Zitterd mitgebrach.

Koeplèt 3:
En ’t allerschoonste vruike mit ’n auwt verdreug gezich,
löp dan nao zien prooj te zuike, dat verschangeleierde dich.
Dan peune dich waal hònderd mundjes, loat dan de vrouw zoolang mer toes.
Elk muulke kos dich weier rundjes, mèr pas op, oh wee, gedraag dich neit schaloes.